" #ابنى_رافض_الأكل ،، #أعمل_إيه؟ 😔 "
الجملة دي بنسمعها كدكاترة أطفال من كل الأمهات ،، وديماً بتتخيلوا ان الحل في دوا يفتح الشهية
لأ،،طبعا
الطفل طفل ومحتاج نتعامل معاه بنفس طريقة تفكيرة وبأساليب طفولية شوية ،،
*في طريقة تقديمنا للأكل
*في شكل الأكل
*في أسلوبنا معاه،، وهكذا
لكن الاجبار والضغط مستحيل يجيب نتيجة مع اطفالنا 🚫
هنقدم ٢٠ اقتراح لتحسين شهية الطفل ونحاول نطبقها
١- وجبة الإفطار
عارفة ان وجبة الفطار بتحسن من عملية التمثيل الغذائي للجسم علي مدار اليوم وبالتالي بتحسّن من شهية الطفل،، يعني الطفل اللي مش بيفطر طبيعي ان شهيته للأكل تقل باقي االيوم 👎
وعلشان كدا لاااازم تكون وجبة الفطار في البيت الزامية وصحية حتي لو بسيطة
٢- نقدم للطفل ميّه يشربها قبل الاكل بنصف ساعه
المفروض نشّرب الطفل ميّه اول مايصحي من النوم وحتي قبل مايشرب اللبن بتاعه كمان ،، وعلي مدار اليوم >>>يكون قبل الاكل بنصف ساعه،، هتفرق في شهيته جداً .. #جربوها
٣- تقديم الأكل كل ساعتين
فيه أطفال مش بتجوع اوي وبالتالي بترفض تاكل لعدم احساسها بالجوع ،، الحل معاهم يكون بتقديم وجبات منتظمة كل ساعتين ودا هيحسن من أداء الجهاز الهضمي وبالتالي هيحسن من شهيتهم وهيطلبوا الأكل أكتر،
٤- الفول السوداني
ودا بيسموه "ملك المكسرات"
ودا لدوره المهم في تحسين الشهية وامداد الجسم بالبروتينات
حاولوا تدخلوه علي شكل زبده او كريمه او بأي طريقه بقا ..انا مش الشيف حسن 😜 ،،، وبلاش نقدمة بالشكل العادي (حبوب) قبل سن ٤ سنوات خوفاً من البلع بطريقة خطأ
٥-الزبادي بيفتح الشهية
علشان بيحتوي علي بريبيوتك وكالسيوم واللي ليهم دور فعال في تحسين الشهية
٦-قدمي الاكل اللي بيحبوه الاول
الاطفال اللي شهيتهم معدومة للأكل بس بيحبوا اكلات معينة ،، نقدمها في الاول ومن خلالها يتقبل فكرة انه ياكل من الاساس وبعد كدا نبدأ وراها
٧- بلاش تعتبروا اللبن وجبة،، غلط ❌
فيه اطفال كتير بتعاني من فقدان الشهية بسبب too much milk ,, بيشربوا لبن اووفر،، ودا بيقلل من تقبلهم للأكل بشكل قوي ،، قدمي اللبن في شكل اكل ،،جبنه،، زبادي،، كريمه ،، وهكذا
٨-بلاش اكلات #هندية
اشمعني هندية،، لانهم ديما بيستخدموا توابل وبهارات قوية للأكل دا غير السمنه والزيوت ومعروفين بكدا ،، فلو بنقدم للطفل الاكل بالطريقة دي ،، انسي انه ياكل ،، قللي الزيت او السمنه تماماً،، واستخدام البهارات والنكهات للأطفال محبب بس بطريقة بسيطة زي النصيحة اللي جايه 👇
٩-التوابل بتفتح الشهية
الشمر والقرفة والكزبره وغيره كتير,, بتساعد في تحسين شهية الطفل بس نستخدمها بأسلوب بسيط
١٠- عصير الليمون الفريش ..الزنجبيل بالعسل
الليمون بيساعد علي الهضم والشهية
الزنجبيل مع العسل بيحسن من الشهية والمناعه كمان
١١-خليهم مبسوطين أثناء الأكل
بلاش نتطرق لاحاديث ممكن تدايق الطفل اثناء الاكل وتوتره ،، حاولوا تتكلموا معاهم عن اي شيء يبسطهم ،، هتفرق👍
١٢-الجو الحر بيقلل الشهية
بالفعل لو الطفل قاعد في جو حر صعب ياكل كويس ،، لازم نهوي المكان كويس أثناء الأكل وبالاخص واحنا داخلين علي الصيف
١٣-اللعب وممارسة الرياضة بتفتح الشهية
جربي كدا تزودي وقت اللعب لابنك او تخليه يمارس رياضة بيحبها وشوفي الفرق 💪
١٤-المشاركة
معظم الاطفال اللي شهيتهم قليله بتتشجع نفسيا لما بتشوف اطفال بتاكل معاها كويس.. فلو قدرنا نعمل مشاركه هتفرق ..دا غير دور الحضانه واللي معظهم بيطبق الاسلوب دا في الاكل
١٥-الزنك بيفتح الشهية
بيفرق جداً في تحسين الشهية ،، الكاجو ونخالة القمح بيحسنوا من مستوي الزنك في الجسم ،، وممكن نقدم الزنك علي شكل دوائي
١٦- الحديد بيفتح الشهية
انيميا نقص الحديد من اهم مسببات قلة الشهية فلازم نستبعدها ،، ولو موجوده بيتم اعطاء الحديد للطفل لمدة ٣ شهور ،،
حصول الطفل علي جرعات من الحديد كوقاية من الانيميا بتفرق في تحسين الشهية
١٧-الحلويات
تقديم الحلويات اللي من مكوناتها فاكهة كتير،، بتساعد في عملية الهضم والتمثيل الغذائي فبتحسن من شهية الطفل ،، وكمان بتشجعه انه يخلص وجباته علشان يحصل عليها من الناحية النفسية.
افضل الفواكه اللي بتفتح الشهية
التوت والعنب والتفاح 👌
١٨-الوجبات الخفيفة
الطفل اللي بيعتمد علي الوجبات الخفيفه لقلة شهيته لازم نستغلها في اننا نقدم اكل صحي مكانها تدريجياً
بدل ما بنقدمله بسكويت نخليها سندوتش مثلاً
بدل ما بنقدمله شيبسي نخليها فاكهة
التبديل هيفرق جداً في تحسين الشهية
١٩-شكل الأكل
٩٠٪ من الأطفال بيعتمدوا في شهيتهم علي الشكل ،، نحاول نقدملهم بطرق جميلة تلفت نظرهم ،، بتفرق جداً
٢٠- سجلوا ،،
لو ابنك في يوم أكل كويس جداً ،، سجلي كل الملاحظات اللي حصلت في اليوم دا ،، اكل فين ؟ مع مين ؟ اكل ايه؟ شرب مياه او ليمون قبل الاكل ؟
وابدأي تنفيذها في الايام اللي بعد كدا .. اولادنا يستاهلوا نتعب علشانهم ،، مش كدا ولا ايه ؟ 😊
